លោក កែវ សារ៉េត ៖ គ្រូបង្វឹកថ្មីស្ថិតក្រោមការសម្រេចចិត្តហុងដា គាត់អាចប្តូរគ្រូថ្មីបានគ្រប់ពេល

0
2641

សហព័ន្ធ​បាល់ទាត់​កម្ពុជា​បាន​ប្រកាស​ផ្លូវ​ការ​ពី​ការ​​តែង​តាំង​លោក Ryu Hirose ​​ជា​គ្រូ​បង្វឹក​​ក្រុម​ជម្រើស​ជាតិ​បាល់ទាត់​កម្ពុជា​ កាល​ពី​ពេល​ថ្មីៗ​នេះ​ ​ស្រប​ពេល​លោក​ Honda ត្រូវ​បាន​ប្រកាស​​ត​កុង​ត្រា​ថ្មី​ក្នុង​នាម​ជាអ្នកចាត់ការ​រហូត​ដល់​ឆ្នាំ​២០២៣ ​ដែល​កម្ពុជា​ធ្វើ​ជា​ម្ចាស់ផ្ទះ​ព្រឹត្តិការណ៍​កីឡា​ស៊ីហ្គេម​លើក​ទី​២៣​។

​យ៉ាង​ណា​កុង​ត្រា​ថ្មី​របស់​លោក​ Honda ត្រូវ​បាន​សហព័ន្ធ​ប្រកាស​រួច​ហើយ​។ ​ចុះ​កុង​ត្រា​របស់​លោក Ryu Hirose ​វិញ​? ទាក់​ទង​រឿងនេះ​លោក កែវ សារ៉េត អគ្គលេខាធិការ​​សហព័ន្ធ​កីឡា​បាល់ទាត់​កម្ពុជា​បាន​​ពន្យល់​ដូច្នេះ​ថា​៖ «​តាម​ពិត​ទៅ​យើង​ធ្វើ​កុង​ត្រា​ត្រឹម​លោក Honda ប៉ុណ្ណោះ​ ដោយ​យើង​ធ្វើ​កុង​ត្រា​ដល់​ចប់​ស៊ីហ្គេម​​ឆ្នាំ​២០២៣។ ចំណែក​កុង​ត្រា​របស់​លោក Ryu Hirose ​វិញ​​គឺ​ស្ថិត​​នៅ​លើ​​លោក Honda ​ជា​អ្នក​ចាត់ចែង​។ ​មិនមែន​តែ​គ្រូ​ធំ​ទេ​ ដែល​ស្ថិត​ក្រោម​លោក​ Honda ​អ្នក​ចុះ​កុងត្រា​នៅ​មាន​លោក​គ្រូ​បង្វឹក​ផ្សេង​ៗ​ទៀត រួម​ទាំង​ក្រុមការងារ​​មួយ​ចំនួន​ទៀត​ក្នុង​ក្រុម​ជម្រើស​ជាតិ​។ ដូច្នេះ​បើ​សិន​ដល់​ពេល​កំណត់​ឆ្នាំ​២០២៣​បញ្ចប់​ ហើយ​យើង​បញ្ចប់​ជា​មួយ​ Honda  មាន​ន័យ​ថា យើង​បញ្ចប់​​ជា​មួយ​គ្រូ​បង្វឹក​ដូច្នេះ​ដែរ»។

​​​​រំលឹក​ថា Honda ជា​​កីឡា​បាល់ទាត់​កម្ពុជា​កម្រិត​ពិភព​លោក​មួយ​រូប ដែល​ចំណាយ​ថវិកា​ផ្ទាល់​ខ្លួន​ក្នុង​ការ​ជួយ​​ជ្រោមជ្រែង​ជម្រើស​ជាតិ​ចាប់តាំង​ពី​ការ​ប្រការ​ចូលកាន់​តំណែង​ជា​​អ្នក​ចាត់ការ​កម្ពុជា​កាល​ពី​ខែ​សីហា ឆ្នាំ​២០១៨ ហើយ​ថែម​ទាំង​មិន​បាន​យក​ប្រាក់​ខែ​ពី​កម្ពុជា​ថែម​ទៀត​ផង​៕

ប្រភព៖ sabay

Loading...