វៀតណាម កំពុងពិចារណាជម្រើស ២ សម្រាប់ស៊ីហ្គេមឆ្នាំ ២០២១

0
236
ម្ចាស់ផ្ទះស៊ីហ្គេមវៀតណាម សម្រេចរក្សាទុកសេណារីយោត្រឹម២ គឺរក្សានៅឆ្នាំ២០២១ ឬពន្យារពេលទៅ ឆ្នាំ២០២២
នៅក្នុងកិច្ចប្រជុំក្រុមប្រឹក្សាអាស៊ីអាគ្នេយ៍ នៅរសៀលថ្ងៃទី២៤ ខែមិថុនា ឆ្នាំ២០២១ គឺម្ចាស់ផ្ទះស៊ីហ្គេម វៀតណាម ឆ្នាំ២០២១ បានរក្សាទុកនូវសេណារីយោត្រឹម២ប៉ុណ្ណោះ ដោយរក្សាកាលបរិច្ឆេទ នៅចុងឆ្នាំ២០២១ដដែល ឬអាចពន្យារពេលទៅឆ្នាំ២០២២វិញ នេះបើតាមការបញ្ជាក់របស់ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា តំណាងឯកឧត្តមបណ្ឌិត ថោង ខុន រដ្ឋមន្រ្ដីក្រសួងទេសចរណ៍ និងជាប្រធាន NOCC ដែលបានចូលរួមប្រជុំជាមួយក្រុមប្រឹក្សាកីឡាអាស៊ីអាគ្នេយ៍ ដែលជាក្រុមប្រឹក្សារៀបចំការប្រកួតកីឡាស៊ីហ្គេម តាមប្រព័ន្ធអនឡាញ។
May be an image of 1 person
ឯកឧត្តមសង្កត់ធ្ងន់ថា កិច្ចប្រជុំនេះ គឺជាកិច្ចប្រជុំដ៏មានសារៈសំខាន់ ដើម្បីស្ដាប់របាយការណ៍ចុងក្រោយ ក៏ដូចជាស្ដាប់ការសម្រេចចិត្តរបស់ក្រុមប្រឹក្សាកីឡាអាស៊ីអាគ្នេយ៍ ក្នុងការពិនិត្យមើលលទ្ធភាពរបស់វៀតណាម ដែលត្រូវធ្វើម្ចាស់ផ្ទះកីឡាស៊ីហ្គេម ឆ្នាំ២០២១ ថាតើត្រូវរក្សាទុកនូវកម្មវិធី និងពេលវេលា នៃការប្រកួតដដែល ឬមួយក៏ត្រូវលើកពេល? ដូច្នេះកិច្ចប្រជុំមានរបៀបវារៈ ៣សំខាន់ៗ ទី១-របាយការណ៍វឌ្ឍនភាព និងការសម្រេចចិត្តរបស់ភាគីវៀតណាម ក្នុងការត្រៀមធ្វើជាម្ចាស់ផ្ទះស៊ីហ្គេម លើកទី៣១ ឆ្នាំ២០២១ ទី២-ការធ្វើសេចក្ដីរាយការណ៍ខ្លី អំពីវឌ្ឍនភាពការងាររបស់គណៈកម្មាធិការជាតិអូឡាំពិកកម្ពុជា ក្នុងការរៀបចំស៊ីហ្គេម ឆ្នាំ២០២៣ និងទី២-ការទទួលយក ឬអត់ នៃប្រទេសបន្ដវេណធ្វើម្ចាស់ផ្ទះ បន្ទាប់ពីស៊ីហ្គេម ឆ្នាំ២០២៣ គឺមានឆ្នាំ២០២៥ នៅថៃ ឆ្នាំ២០២៧ នៅព្រុយណេ និងឆ្នាំ២០២៩ នៅឡាវ។ ប្រទេសនីមួយៗ បានជជែក និងពិភាក្សាគ្នាយ៉ាងល្អិតល្អន់ ហើយប្រទេសនីមួយៗបានបញ្ចេញនូវអំណះអំណាងរៀងៗខ្លួនក្នុងការទទួល ឬមិនទទួលយក ក្នុងការសម្រេចចិត្តរបស់វៀតណាម ដែលចង់ពន្យារពេលស៊ីហ្គេម រយៈពេលវែង។
May be an image of one or more people and crowd
កាលពីប្រជុំលើកមុន វៀតណាមបានដាក់សេណារីយោ ៣ ដើម្បីធ្វើការពិគ្រោះយោបល់ និងការសម្រេចពីរដ្ឋាភិបាលវៀតណាម។ ឥឡូវនេះ ដោយសារគណៈកម្មាធិការអូឡាំពិកវៀតណាមបានអះអាងថា មិនទាន់បានទទួលការសម្រេចចិត្តពីរដ្ឋាភិបាលនៅឡើយទេ ប៉ុន្ដែរដ្ឋាភិបាលវៀតណាមសុំកិច្ចប្រជុំនេះ ដោយកំណត់យកលក្ខខណ្ឌតែ ២ប៉ុណ្ណោះ ដើម្បីយកទៅធ្វើការសម្រេចចិត្ត។ មានន័យថា កាលមុន សេណារីយោមាន៣ ប៉ុន្តែឥឡូវបន្ថយមកនៅសេណារីយោតែ២ទេ គឺទី១-ប្រទេសទាំងអស់ សុំឲ្យរក្សានូវកម្មវិធី ឬកាលបរិច្ឆេទនៅដដែល គឺរៀបចំពីថ្ងៃទី២១ ខែវិច្ឆិកា ដល់ថ្ងៃទី២ ខែធ្នូ ឆ្នាំ២០២១ និងទី២-ពិភាក្សា និងអនុម័តទៅលើវៀតណាមអាចនឹងលើកទៅឆ្នាំ២០២២ ក្នុងខែមេសា ឬខែឧសភា មិនឲ្យលើសពីខែនេះទេ តែដោយឡែក កម្ពុជាយើងបានសំណូមពរបើសិនជាវៀតណាមចង់លើកពេលទៅឆ្នាំក្រោយ កុំយកខែឧសភា ព្រោះវាជាន់នឹងការរៀបចំព្រឹត្តិការណ៍ប្រកួតកីឡាជាតិរបស់យើង។
May be an image of 4 people and people standing
ឯកឧត្តមអគ្គលេខាធិការបញ្ជាក់ថា អង្គប្រជុំបានដាក់សេណារីយោ២នេះ ហើយភាគីវៀតណាម បានឆ្លើយតបដោយពេញចិត្តថា សេណារីយោទាំង២នេះ នឹងដាក់ជូនរដ្ឋាភិបាលរបស់ខ្លួន ដើម្បីធ្វើការសម្រេចជាចុងក្រោយក្នុង២សប្ដាហ៍ខាងមុខ។ មានន័យថា នៅថ្ងៃទី៨ ខែកក្កដា ឆ្នាំ២០២១ ខាងមុខនេះ ការកោះប្រជុំរបស់គណៈអចិន្ដ្រៃយ៍សហព័ន្ធកីឡាអាស៊ីអាគ្នេយ៍ នឹងអនុម័តចុងក្រោយ ហើយបានដាក់លក្ខខណ្ឌឲ្យវៀតណាមថា ត្រូវតែអនុម័តចុងក្រោយ នៅថ្ងៃទី៨ ខែកក្កដាខាងមុខនេះ។ ទោះយ៉ាងណាក៏ដោយ ការអនុម័តចុងក្រោយនេះមិនមានន័យថា វៀតណាមទទួលបានការសម្រេចក្នុងអង្គប្រជុំនេះទេ ព្រោះថាអង្គប្រជុំបានពិភាក្សាគ្នាហើយ និងបានលើកការប្រជុំនេះទៅឲ្យគណៈកម្មាធិការប្រតិបត្តិរបស់សហព័ន្ធកីឡាអាស៊ីអាគ្នេយ៍សម្រេចទៀត ទើបអាចចេញជាស្ថាពរបាន។ ប៉ុន្ដែជាទស្សនទានរួមរបស់អង្គប្រជុំ គឺបានអបអរសាទរចំពោះសេណារីយ៉ូទាំង២នេះថា បើវៀតណាមយកសេណារីយោមួយណា គឺប្រទេសទាំងអស់នឹងគោរពតាម ហើយនឹងខិតខំរៀបចំខ្លួនដើម្បីចូលរួម បើទោះបីជាប្រទេសភាគច្រើនមានបញ្ហានៅឆ្នាំ២០២២ ដោយឆ្នាំក្រោយវាប៉ះដល់ការប្រកួតកីឡាជាច្រើនទៀតរបស់ប្រទេសនីមួយៗ ដោយសារប្រភេទកីឡាមួយចំនួនត្រូវលើកទៅឆ្នាំ២០២២ ។
May be an image of standing
«ទោះបីវៀតណាម លើកពេលទៅឆ្នាំ២០២២ក៏ដោយ ក៏កម្ពុជា ចាប់ពីឆ្នាំ២០២២ គឺអាចធ្វើការងាររបស់ខ្លួនក្នុងនាមជាប្រធានក្រុមប្រឹក្សាកីឡាអាស៊ីអាគ្នេយ៍បណ្ដោះអាសន្ន យើងមិនទាន់ទទួលការផ្ដល់សិទ្ធិអំណាចជាផ្លូវការមែន តែក្នុងអង្គប្រជុំ ប្រទេសទាំងអស់ឯកភាពថា កម្ពុជាអាចរក្សានូវផែនការយុទ្ធសាស្ដ្រ និងការងាររបស់ខ្លួន នៅដើមឆ្នាំ២០២២តទៅ។ យើងនឹងចាប់ផ្ដើមយុទ្ធនាការទូទាំងប្រទេស និងយុទ្ធនាការលើឆាកអន្ដរជាតិអំពីស៊ីហ្គេម និងអាស៊ានប៉ារ៉ាហ្គេម ឆ្នាំ២០២៣របស់យើង គឺគេបានគាំទ្រ ហើយកិច្ចប្រជុំក្រុមប្រឹក្សាកីឡាអាស៊ីអាគ្នេយ៍មុនស៊ីហ្គេមនៅវៀតណាមក៏បាន គេថាអត់មានបញ្ហាអ្វីទេ គេឲ្យយើងធ្វើ។ បានន័យថា យើងទទួលបានការគាំទ្រពេញទំហំពីសហព័ន្ធកីឡាអាស៊ីអាគ្នេយ៍ឲ្យយើងធ្វើជាម្ចាស់ផ្ទះ ដោយមិនមានការប៉ះទង្គិចផ្លូវច្បាប់ ឬបញ្ហាអ្វីឡើយ»។ នេះជាការអះអាងបន្ថែមរបស់ឯកឧត្តម វ៉ាត់ ចំរើន៕
May be an image of 6 people, people standing and text that says "VIETNAM 2021 31st SEA GAMES"
Loading...