ឯកឧត្តម យី វាសនា៖ ការប្រកួតជើងឯកអត្តពលកម្មប៉ារ៉ាឡាំពិកឆ្នាំនេះ កម្រិតសមត្ថភាពយុវជនមានគុណភាពល្អ

 

CAMSOC-ភ្នំពេញ៖ ការប្រកួតជ្រើសរើសជើងឯកថ្នាក់ជាតិកីឡាអត្តពលកម្មប៉ារ៉ាឡាំពិក ប្រចាំឆ្នាំ២០២១ រយៈពេលពីរថ្ងៃ ចាប់ពីថ្ងៃទី២០ ដល់ថ្ងៃទី២១ ខែធ្នូ ត្រូវបានឯកឧត្តម យី វាសនា អគ្គលេខាធិការ គណៈកម្មាធិការជាតិប៉ារ៉ាឡាំពិកម្ពុជាបានវាយតម្លៃថា អត្តពលិកកីឡាជនពិការវ័យក្មេង ដែលចូលរួមប្រកួតប្រជែងមានគុណភាពសមត្ថភាពល្អ ដោយដណ្តើមជ័យលាភីជំនួសតំណែងកីឡាករចាស់ៗ។

ឯកឧត្តមអគ្គលេខាធិការបន្ថែមថា តាមរយៈការប្រកួតនេះ អត្តពលិកឆ្នើមៗ ដែលប្រជែងបានជ័យលាភីនឹងក្លាយជាអត្តពលិកសក្តានុពលរបស់កម្ពុជា ត្រៀមខ្លួនដណ្តើមមេដាយជូនជាតិ ក្នុងព្រឹត្តិការណ៍អាស៊ានប៉ារ៉ាហ្គេម លើកទី១២ ឆ្នាំ២០២៣ ដែលកម្ពុជាធ្វើជាម្ចាស់ផ្ទះ។

ឯកឧត្តម យី វាសនា ក៏បានអំពាវនាវឲ្យកីឡាករ កីឡាការិនីជនពិការ ដែលគិតថាខ្លួនមានសមត្ថភាព អាចដាក់ពាក្យចូលរួមប្រកួតជ្រើសរើសជើងឯកលើប្រភេទកីឡាផ្សេងៗ ដែលគ្រោងរៀបចំនាពេលខាងមុខជាបន្តបន្ទាប់ទៀត ដើម្បីឲ្យក្លាយខ្លួនទៅជាកីឡាករ កីឡាការិនីប៉ារ៉ាឡាំពិកកម្ពុជា ត្រៀមឆ្ពោះទៅទទួលធ្វើម្ចាស់ផ្ទះ ព្រឹត្តិការណ៍អាស៊ានប៉ារ៉ាហ្គេម លើកទី១២ ឆ្នាំ២០២៣ ជាប្រវត្តិសាស្ត្រដំបូងរបស់ព្រះរាជាណាចក្រកម្ពុជា បន្ទាប់ពីការប្រកួតកីឡាអាស៊ានប៉ារ៉ាហ្គេម ២លើកចុងក្រោយត្រូវបានលុបចោល កាលពីឆ្នាំ២០១៩ នៅប្រទេសហ្វីលីពីន និងឆ្នាំ២០២២ ខាងមុខ នៅប្រទេសវៀតណាម។

សូមបញ្ជាក់ថា ការប្រកួតជ្រើសរើសជើងឯកថ្នាក់ជាតិ អត្តពលកម្មប៉ារ៉ាឡាំពិក ឆ្នាំ២០២១ មានអត្តពលិកចូលរួមប្រកួតចំនួន ៦០នាក់ ដោយប្រកួតលើ ២០វិញ្ញាសា៕