កុសែន ប្រឹងហ្វឹកហាត់ខ្លាំង ដើម្បីកៅអីជម្រើសជាតិនាពេលខាងមុខ

រដូវកាលនេះ សេង កុសែន មានវ័យ៣១ឆ្នាំហើយ ដែលត្រូវបានចាត់ទុកជាវ័យមួយជ្រេ។ ប៉ុន្តែខ្សែការពារក្លឹបនគរបាលជាតិ មិនបណ្ដោយខ្លួនឱ្យជ្រេតាមវ័យទេ គឺគេបានខិតខំហ្វឹកហាត់ខ្លួនឯងបន្ថែម បន្ទាប់ពីហ្វឹកហាត់ជាមួយក្លឹប។

អតីតកីឡាករភ្នំពេញក្រោន បានពន្យល់បែបនេះថា ៖«រឿងហាត់ខ្លួនឯងបន្ថែមហ្នឹងភាគច្រើនខ្ញុំហាត់ពេលព្រឹក ចឹងក្លឹបគាត់ហាត់ពេលល្ងាច ចឹងទៅខ្ញុំហាត់​ថែមខ្លួនឯងនៅពេលព្រឹក ថែមខ្លួនឯងហ្នឹងប្រហែល១ម៉ោង១ម៉ោងកន្លះ យើងធ្វើកម្លាំង ឬក៏យើងជីមខ្លួនឯង ល្ងាចយើងហាត់ជាមួយក្លឹបទៀត»។

​ទោះបីរវល់ប៉ុណ្ណាក៏ដោយ ក៏កីឡាករសាច់ពោះ៦កង់​ឆ្លៀតពេលហាត់បន្ថែមដែរ មិនចាំតែការហ្វឹកហាត់​នៅក្លឹបឡើយ។ អាយុកាន់តែច្រើន គឺកាន់តែហាត់។ មួយសប្ដាហ៍អតីតកីឡាករក្រោន ហាត់បន្ថែម៣ថ្ងៃដោយក្នុងមួយថ្ងៃ ត្រូវហាត់រយៈពេលពីមួយម៉ោងទៅមួយម៉ោង៣០នាទី ដើម្បីរក្សាទម្រង់ កម្លាំង និងរូបរាងកាយ។

ខ្សែការពារលេងសឹងគ្រប់ក្លឹបនៅលីគកំពូលកម្ពុជា បានបន្ថែមថា ៖«អាយុយើងកាន់តែច្រើន បើយើងមិនបន្ថែមខ្លួនឯងទេ យើងអត់មានកម្លាំងដេញក្មេងៗទាន់ទេ ក្មេងៗឥឡូវល្អៗណាស់ អត់ចាំតែក្លឹបហាត់ទេ បើយើងចាំក្លឹបហាត់ទៅអត់រួច បើយើងចាំតែក្លឹបហាត់ គីឡូយើងក៏ឡើងកម្លាំងយើងក៏អត់គ្រប់»។

បើតាមសម្ដីរបស់កូនក្រុមលោក អ៊ុង កងយ៉ានិត ការហ្វឹកហាត់បន្ថែមនេះដែរ ពិតមានអត្ថប្រយោជន៍ច្រើន និងអាចឱ្យរូបគេដើរលើវិថីមួយនេះបានយ៉ាងហោចណាស់ពីរទៅបីឆ្នាំទៅមុខទៀត។

ប្រភព៖ sabay