លោក ហ៊ុន បូរី បានពន្យល់ពីសិទ្ធិអនុគ្រោះ (Wild Card) សម្រាប់ការចូលរួមប្រកួតរបស់អត្តពលិកកម្ពុជាថា «យើងបានទៅប្រកួតជម្រុះ នៅទីក្រុងដូហា ប្រទេសអារ៉ាប់រួម កាលពីឆ្នាំ២០១៩ ដោយកំណត់ថិរវេលាមិនបានជាប់ (qualified) ក្នុងវគ្គជម្រុះនោះឡើយ។ ដូច្នេះហើយ អូឡាំពិកអន្តរជាតិ បានអនុញ្ញាតឲ្យកម្ពុជាយើង លេងបានត្រឹមតែ១វិញ្ញាសាប៉ុណ្ណោះ។ ប៉ុន្តែប្រសិនបើអត្តពលិកយើង អាចធ្វើបានល្អ ក្នុងការជម្រុះលើកទី១ ក្នុងពេលប្រកួតអូឡាំពិកឆាប់ៗខាងមុខនេះ មានន័យថា គាត់អាចបន្តលេងនៅក្នុងការប្រកួតពាក់កណ្ដាលផ្តាច់ព្រ័ត្រ ឬផ្ដាច់ព្រ័ត្រ ទៅតាមថិរវេលាដែលគាត់ធ្វើបានល្អ ក្នុងកម្រិតកបច្ចេកទេសរបស់គាត់ ដែលត្រូវបានធ្វើកំណត់ត្រានៅក្នុងលទ្ធផលអត្តពលកម្មពិភពលោក»។

លោកអគ្គលេខាធិការរូបនេះបន្ថែមទៀតថា កីឡាករអត្តពលកម្មជម្រើសជាតិកម្ពុជា ប៉ែន សុគង់ កំពុងបង្កើនការហ្វឹកហាត់យ៉ាងយកចិត្តទុកដាក់ ដើម្បីត្រៀមចូលរួមប្រកួតលើវិញ្ញាសារត់ល្បឿន១០០ម៉ែត្រ នៅក្នុងព្រឹត្តិការណ៍អូឡាំពិកហ្គេម នៅទីក្រុងតូក្យូ ប្រទេសជប៉ុន ឆ្នាំ២០២០ (Tokyo Olympic Games 2020) ដែលនឹងដំណើរការជាផ្លូវការពីថ្ងៃទី២៣ ខែកក្កដា រហូតដល់ថ្ងៃទី៨ ខែសីហា ឆ្នាំ២០២១ (ពន្យារពេល)។ ចំពោះសិទ្ធផលហ្វឹកហាត់ (Performent) របស់បេក្ខភាពអូឡាំពិកហ្គេមរបស់កម្ពុជារូបនេះ គឺធ្វើបានក្នុងថិរវេលា ១០.៨៧ វិនាទី។

សូមបញ្ជាក់ថា កម្ពុជាបានត្រៀមចូលរួមប្រកួតកីឡាអូឡាំពិក ឆ្នាំ២០២០ មានចំនួន២ប្រភេទកីឡា គឺអត្តពលកម្ម ប្រកួតដោយកីឡាករ ប៉ែន សុគង់ និងកីឡាហែលទឹក១វិញ្ញាសាហែលសេរី៥០ម៉ែត្របុរស-នារី៕